يوم طلاقي
وفي يوم، سمعت خبط على الباب.. قلبي دق للحظة بغباء، قولت يمكن شيرين حست بيا أو جاية تشمت فيا بنفسها، فتحت الباب بلهفة، لقيت محضر ومعاه إنذارات وإعلانات قضايا.شيرين مسبتش مليم من حقوقها.. رفعت قضايا بالمؤخر كله، ونفقة المتعة والعدة، وقائمة المنقولات بكل تفصيلة فيها، وتعويض محترم عن كل ضرر سببتهولها، وكل مليم استخسرته فيها زمان، القانون نزل يجرده مني بالحرف الواحد.اضطررت أبيع عربيتي عشان أسدد المبالغ اللي انحكم بيها عليها، والشركة اللي كنت شريك فيها خسرت نصيبي فيها بعد ما سمعتي بقت في الأرض ومراتي التانية رفعت هي كمان قضايا نفقة ومؤخر عشان تنهش اللي باقي مني.
في يوم، كنت واقف في ممر المحكمة بعد جلسة تسوية، متبهدل، بهدومي البسيطة اللي انطفت، وشيرين خارجة من قاعة المحكمة زي الملكة.. رافعة راسها، لابسة أشيك حاجة، ومحامي كبير ماشي جنبها بيناولها أوراق مستحقاتها اللي اتدفعت بالكامل.حاولت أمد إيدي وأقرب منها وأنا بهمس بصوت واطي ومكسور: “شيرين.. سامحيني، أنا خربت بيتي بإيدي وضيعت كل حاجة.. جردتيني من كل اللي حيلتي.
. متقسيش عليا كده”.وقفت شيرين وبصتلي في عيني بثبات مفيش فيه حتى ذرة غضب ولا حقد، وقالت بصوت هادي القاعة كلها سمعته: “الرحمة دي كانت في إيدك يوم ما جيتلك بترجاك على شريط مسكن وقفلت بابك في وشي ورميتلي منديل ورق.. أنا مباخدش منك انتقام، أنا باخد حقي وحق شقايا اللي استكترته عليا بالقانون بس، وباقي حسابك عند اللي مبيغفلش”.لفت ضهرها ومشيت بخطوات واثقة ونزلت لعربيتها الفخمة، وسابتني واقف في الممر.. مفلس، مكسور، ووحيد.. بعد ما كنت فاكر إني أملك الدنيا بالفلوس والمنظرة، بقيت قاعد في شقتي الفاضية على البلاط، بتمنى لو يرجع بيا الزمن وأبوس تراب رجليها قبل ما أضيعها بغبائي وظلــ,,ـــــمي.
مرت سنتين كاملين، والحياة دارت دورتها وجابت عاليها واطيها..شيرين مخدتش فلوس القضايا وتصرفها على المظاهر، لأ.. الست الهانم اللي احتضنتها، وقفت جنبها بجد وفتحتلها الأبواب اللي كانت مقفولة في وشها، وبخبرة شيرين القديمة اللي أنا كنت دافنها ومضيعها في خدمة البيت والتحكم، شاركت الهانم في مشروع تصميم وأزياء راقي كان حلمها من سنين.المشروع كبر وبقى علامة تجارية معروفة ليها فروع في أرقى المولات، وشيرين اتحولت لسيدة أعمال ليها وزنها واسمها في السوق، صورتها بقت تنزل في مجلات الموضة، والناس بتتهافت عشان تشتغل معاها أو تاخد موعد في شركتها. بقت هانم بجد، هانم بأصلها، ونجاحها، وتعبها اللي ربنا كافأها عليه بعد سنين الصبر والذل.
